Fiskeriforvaltning som tar vare på verdifull marin natur
Fiskeridirektoratet har innført ei rekke arealbaserte fiskeritiltak som gir positive og varige effektar for å bevare naturmangfaldet. Det kjem fram av ei fersk stortingsmelding, «Heilskapleg nasjonal plan for bevaring av viktige område for marin natur».
– Den nasjonale planen for bevaring av viktige område for marin natur omfattar arealbaserte bevaringstiltak knytt til fiskeriregelverket, seier seniorrådgivar Gunnstein Bakke ved Fiskeridirektoratets utviklingsseksjon.
– Fiskeritiltaka i planen dekkjer minst 44 prosent av norske havområde. Dei er særleg retta mot ein del av områda som er viktige for biologisk mangfald og økosystemtenester, og tiltaka brukast for å ta vare på undersjøisk natur.
Døme på dette er samfunn av sjeldne eller trua artar, artar med avgrensa utbreiing, sentrale område for biologisk mangfald, område med kritiske økosystemfunksjonar og -tenester eller område for økologisk samanheng. Også område med urørt natur, særleg på havbotn, er vurdert i den nasjonale planen for heilskapleg havforvaltning.
Forby eller avgrense bruk av fiskereiskap
– Innanfor fiskeria gir tiltak som forbyr eller avgrensar bruken av fiskereiskapar, særleg på havbotnen, viktige bidrag til bevaring av naturmangfaldet. Trålforbod i viktige område for marin natur vil til dømes kunne bøte på forstyrring av sårbare botnhabitat, seier Bakke med referanse til stortingsmeldinga.
Miljødirektoratet og Fiskeridirektoratet har vurdert i kva grad tiltak under fiskeriregelverket kan reknast som effektive arealbaserte bevaringstiltak, og stortingsmeldinga gjer greie for fleire av desse tiltaka.
Arealbaserte fiskeritiltak
Dei arealbaserte fiskeritiltaka som er vurdert hittil er:
- Stengte områder for fiske ved Svalbard
For å beskytte sårbare artar, habitat og for å bidra til å bevare biologisk mangfald er det i ti utvalde område ved Svalbard innført forbod mot fiske med botnreiskap.
- Beskyttelse av korallrev
Atten kjende korallrevområde langs kysten er oppretta som marine beskytta område og dermed beskytta mot skade frå fiskeriverksemd.
- Hummarfredingsområde
Det er oppretta fleire bevaringsområde for hummar på Skagerrakkysten, og hummarbestanden har teke seg opp både innanfor og i område rundt bevaringsområda. Fredingsområde for hummar har vist positiv effekt både for hummar, torsk og leppefisk. Totalt er det 51 slike bevaringsområde.
- Regulering av taretråling
Innanfor tarehaustingsområda er det etablert stengde område, der det er forbode å hauste tare, og der tareskogen difor blir ståande urørt av hausting.